उन्हाळ्यात स्मार्टफोन बॅटरी फुगणे-फुटणे टाळायचे? जाणून घ्या सोपे उपाय

भारतात उष्णतेचा प्रचंड कहर सुरू आहे. देशातील जवळपास प्रत्येक भागात, विशेषतः उत्तर आणि मध्य भारतातील काही ठिकाणी  उष्णतेमुळे बिकट परिस्थिती निर्माण झाली आहे. अशा वेळी अनेकदा स्मार्टफोनही खूप गरम होताना दिसतो. अनेकदा ओव्हरहिटिंगमुळे स्मार्टफोनची बॅटरी खराब होण्याचा किंवा फुटण्याचा धोका वाढतो. आज आम्ही तुम्हाला अशा काही स्मार्ट ट्रिक्सबद्दल सांगणार आहोत, ज्यांचा अवलंब करून तुम्ही तुमचा स्मार्टफोन आणि त्याची बॅटरी ओव्हरहिट होण्यापासून वाचवू शकता. यामुळे बॅटरी फुटणे किंवा त्याला आग लागणे यांसारख्या घटना टाळता येऊ शकतात.

फोन उन्हात ठेवू नका

स्मार्टफोन कधीही सूर्यप्रकाशात ठेवू नका. त्यामुळे फोन आणि त्याची बॅटरी खूप लवकर गरम होऊ शकते. अशा परिस्थितीत बॅटरी खराब होण्याची किंवा तिला आग लागण्याची शक्यता अनेक पटींनी वाढू शकते.

कारमध्ये ठेवताना ही गोष्ट लक्षात ठेवा

जर तुम्ही कारमध्ये फोन वापरत असाल तर तो डॅशबोर्डवर ठेवू नका येथे सूर्यप्रकाश पडत असल्याने फोन खूप लवकर गरम होऊ शकतो. फोन कारमध्ये सावलीत ठेवला असला तरी तो लवकर गरम होऊ शकतो, कारण बंद कारमधील तापमान झपाट्याने वाढते. त्यामुळे फोन जास्त वेळ गरम कारमध्ये ठेवू नका.

चार्जिंग करताना ही चूक कधीही करू नका

बेड/उशीवर चार्जिंग करू नका. फोन कधीही बेडच्या गादीवर, उशीवर किंवा अशा मऊ पृष्ठभागावर ठेवून चार्ज करू नका. त्यामुळे फोन खूप लवकर गरम होऊ शकतो. फोन टेबलवर किंवा अशा सपाट ठिकाणी ठेवा जिथे हवा खेळती राहील आणि फोन गरम होणार नाही.

कव्हर काढून टाका:जर तुमचा फोन आधीच गरम झाला असेल आणि तुम्हाला तो चार्ज करायचा असेल, तर त्याचे बॅक कव्हर किंवा केस काढून टाका. यामुळे फोनची उष्णता कमी होण्यास मदत होते. कव्हरसह चार्जिंग केल्यास बॅटरी अधिक वेगाने गरम होऊ शकते.

फास्ट चार्जिंग टाळा: जर तुमचा फोन खूप वेगवान फास्ट चार्जिंगला सपोर्ट करत असेल, तर अत्यंत उष्ण हवामानात दीर्घकाळ फास्ट चार्जिंग वापरू नका. यामुळे फोनमध्ये वेगाने ऊर्जा भरली जाते आणि बॅटरी लवकर गरम होऊ शकते. शक्य असल्यास 10W किंवा 15W च्या स्टँडर्ड चार्जरचा वापर करा.

सॉफ्टवेयर ट्रिक्स

ब्राइटनेस कमी करा: फोनची ब्राइटनेस खूप जास्त असल्यास ती कमी करा. जास्त ब्राइटनेस असल्यामुळे डिस्प्ले लवकर गरम होऊ शकतो. 
हेवी अॅप्स बंद करा:फोनमध्ये गेम्स किंवा इतर जड अॅप्स सुरू असतील तर त्यांना काही काळासाठी बंद करा. हेवी अॅप्समुळे फोनचे तापमान झपाट्याने वाढते. अनेकदा कॅमेरा किंवा व्हिडिओ स्ट्रीमिंगचा सतत वापर केल्यानेही फोन गरम होऊ शकतो.

वरील सर्व ट्रिक्स आणि सूचना लक्षात ठेवून तुम्ही तुमचा फोन गरम होण्यापासून वाचवू शकता. तसेच बॅटरीचे तापमानही नियंत्रणात ठेवता येते, ज्यामुळे बॅटरीचे आयुष्य वाढण्यास मदत होते.