ज्यांना जास्त बॅटरी हवी त्यांच्यासाठी खुशखबर! Realme फोनवर मोठा डिस्काउंट

Realme 16T 5G कंपनीने मे महिन्यात लॉन्च केला होता. हा फोन कंपनीच्या लोकप्रिय हँडसेट्सपैकी एक असून, आपल्या किंमत श्रेणीत अनेक दमदार फीचर्ससह येतो. या फोनचे सर्वात मोठे आकर्षण म्हणजे 8,000mAh क्षमतेची बॅटरी. याशिवाय Realme च्या या फोनमध्ये 6.8 इंचांचा मोठा डिस्प्ले देण्यात आला आहे. फोनमध्ये 50 मेगापिक्सेलचा मुख्य कॅमेरा असून 16 मेगापिक्सेलचा फ्रंट कॅमेराही मिळतो. आता हा फोन मोठ्या सवलतीत खरेदी करण्याची संधी उपलब्ध झाली आहे. चला तर, या फोनवरील जबरदस्त डीलची सविस्तर माहिती जाणून घेऊया.

Realme 16T 5G किंमत

Realme 16T 5G सध्या मोठ्या सवलतीसह खरेदी करण्याची संधी आहे. कंपनीने हा फोन 29,999 रुपये किंमतीत लॉन्च केला होता. या किंमतीत 6GB रॅम + 128GB स्टोरेज व्हेरिएंट मिळतो. मात्र, आता Flipkart वर हा फोन 27,999 रुपये किंमतीत लिस्ट करण्यात आला आहे. म्हणजेच ग्राहकांना थेट 2,000 रुपयांची सूट मिळत आहे.

इतकेच नाही, तर बँक ऑफरचा लाभ घेतल्यास हा फोन आणखी स्वस्तात मिळू शकतो. Flipkart Axis Bank कार्ड किंवा Flipkart SBI Bank कार्डद्वारे पेमेंट केल्यास ग्राहकांना अतिरिक्त 1,500 रुपयांची सूट मिळते. त्यामुळे या फोनवर एकूण 3,500 रुपयांची सवलत मिळून त्याची प्रभावी किंमत 26,599 रुपये इतकी होते. अधिक माहितीसाठी तुम्ही Flipkart च्या ऑफर पेजला भेट देऊ शकता.

Realme 16T 5G स्पेसीफिकेशन

Realme 16T मध्ये 6.8 इंचांचा LCD डिस्प्ले देण्यात आला आहे. या फोनमध्ये 144Hz रिफ्रेश रेट आणि 1,200 निट्सपर्यंत हाय ब्राइटनेस मिळतो. फोनमध्ये MediaTek Dimensity 6300 चिपसेट देण्यात आला आहे. हा फोन Android 16 आधारित Realme UI 7 वर चालतो. यामध्ये स्प्लिट-स्क्रीन मल्टीटास्किंग, फ्लोटिंग विंडो, स्क्रीन रेकॉर्डिंग, OPPO Share आणि iOS फाइल शेअरिंग सपोर्ट यांसारखे फीचर्स आहेत. धूळ आणि पाण्यापासून संरक्षणासाठी फोनला IP69 रेटिंग मिळाली आहे. तसेच मिलिटरी-ग्रेड शॉक-रेझिस्टन्स सर्टिफिकेशनही देण्यात आले आहे. थर्मल मॅनेजमेंटसाठी व्हेपर चेंबर आणि ग्रेफाइट कूलिंग सिस्टमचा वापर करण्यात आला आहे. सुरक्षेसाठी फोनमध्ये साइड-माउंटेड कॅपेसिटिव्ह फिंगरप्रिंट स्कॅनर देण्यात आला आहे.

Realme 16T च्या मागील बाजूस 50 मेगापिक्सेलचा प्रायमरी कॅमेरा आणि f/2.4 अपर्चरसह 2 मेगापिक्सेलचा मोनोक्रोम कॅमेरा देण्यात आला आहे. तर सेल्फी आणि व्हिडिओ कॉलिंगसाठी 16 मेगापिक्सेलचा फ्रंट कॅमेरा मिळतो. कनेक्टिव्हिटीसाठी 5G, VoWiFi, Bluetooth 5.3, IPv6, GPS, NFC आणि USB Type-C पोर्टचा समावेश आहे. फोनमध्ये 8,000mAh बॅटरी असून ती 45W SuperVOOC फास्ट चार्जिंगला सपोर्ट करते.