सोशल मीडिया वापरणाऱ्या मुलांसाठी मोठा धक्का! सरकार लवकरच घेऊ शकते महत्त्वाचा निर्णय

गेल्या काही महिन्यांत सोशल मीडियाचा मुलांवर होणारा नकारात्मक परिणाम रोखण्यासाठी काही देशांनी महत्त्वाची पावले उचलली आहेत. भारतातही मुलांच्या सोशल मीडिया वापरावर केंद्र सरकार निर्बंध घालण्याचा विचार करत आहे. यामध्ये 16 वर्षांखालील मुलांना सोशल मीडियाचा वापर करण्यास बंदी घालण्याचा प्रस्ताव असू शकतो.

एका मीडिया रिपोर्टनुसार, इलेक्ट्रॉनिक्स आणि IT सचिव एस. कृष्णन यांच्या हवाल्याने सांगण्यात आले आहे की, ऑनलाइन सुरक्षा, मानसिक आरोग्य, सोशल मीडिया प्लॅटफॉर्मचे व्यसन लावणारे डिझाइन आणि हानिकारक कंटेंटबाबत वाढत्या चिंतेमुळे जगभरातील अनेक देशांनी मुलांच्या सोशल मीडिया वापरासंदर्भातील नियम अधिक कठोर केले आहेत. कृष्णन यांनी सांगितले की, या विषयावर कोणताही निर्णय घेण्यापूर्वी जागतिक स्तरावरील घडामोडींचा अभ्यास केला जात आहे. ते म्हणाले, "सोशल मीडियाबाबत इतर देशांनी कोणती पावले उचलली आहेत, याचा अभ्यास करण्याची गरज आहे. हा जागतिक चिंतेचा विषय आहे."

गेल्या वर्षी ऑस्ट्रेलिया हा 16 वर्षांखालील मुलांसाठी सोशल मीडियावर बंदी घालणारा पहिला देश ठरला होता. त्यानंतर काही इतर देशांनीही अशाच प्रकारची पावले उचलली आहेत. अलीकडेच या देशांच्या यादीत संयुक्त अरब अमिराती (UAE)चाही समावेश झाला आहे. UAE ने 15 वर्षांखालील मुलांसाठी सोशल मीडियाच्या वापरावर बंदी घातली आहे. अनेक युरोपीय देशही मुलांच्या सोशल मीडिया वापराबाबत कठोर नियम तयार करण्याच्या तयारीत आहेत. कृष्णन यांनी सांगितले की, भारतातही अशाच प्रकारच्या चिंता व्यक्त केल्या जात आहेत. त्यांनी सांगितले, "युरोपियन युनियन आणि इतर देशांसोबत झालेल्या चर्चांमध्ये सोशल मीडियाशी संबंधित जोखमींबाबत सातत्याने चिंता व्यक्त करण्यात आली आहे. भारतातही संसदेच्या स्थायी समित्यांसह विविध संबंधित घटकांनी या जोखमींवर सविस्तर चर्चा केली आहे." कृष्णन यांनी स्पष्ट केले की, याबाबत अद्याप कोणताही अंतिम निर्णय घेण्यात आलेला नाही.

गेल्या महिन्यात ब्रिटननेही 16 वर्षांखालील मुलांसाठी सोशल मीडियावर बंदी घालण्याची घोषणा केली होती. या बंदीमध्ये Facebook, YouTube, Instagram, TikTok, Snapchat आणि X यांसारख्या प्लॅटफॉर्मचा समावेश असू शकतो. मात्र, या बंदीच्या कक्षेत इंस्टंट मेसेजिंग अॅप्स WhatsApp आणि Signal यांचा समावेश केला जाणार नसल्याचे सांगितले जात आहे.