पावसाळ्यात AC मेंटेनन्सची ही ट्रिक्स ठरतील फायदेशीर

देशात मान्सूनची सुरुवात झाली असून हा ऋतू उन्हाळ्यापासून दिलासा देण्यासोबतच अनेक प्रकारच्या अडचणीही घेऊन येतो. उन्हाळ्यात तापमान कमी होत असले तरी हवेत आर्द्रता (Humidity) वाढल्यामुळे घरामध्ये उकाडा आणि अस्वस्थता जाणवू शकते. जर तुम्ही एअर कंडिशनर (AC) वापरत असाल, तर हा हंगाम एसीसाठी वाढलेली आर्द्रता, ड्रेनेज लाईन ब्लॉक होणे आणि आउटडोअर युनिटजवळ कचरा साचणे अशा अनेक आव्हानांसह येतो. मान्सूनमध्ये आर्द्रता वाढल्यामुळे खोलीचे तापमान कमी असले तरीही उन्हाळ्याच्या तुलनेत अधिक अस्वस्थ वाटू शकते. याचे कारण तापमान नसून हवेत असलेली जास्त आर्द्रता असते. अशा परिस्थितीत तुमचा एसी योग्य प्रकारे काम करावा आणि त्याची देखभाल व्यवस्थित व्हावी, यासाठी काही महत्त्वाच्या गोष्टींकडे लक्ष देणे आवश्यक आहे. चला, मान्सूनच्या काळात एसीची देखभाल कशी करावी, याबद्दल सविस्तर जाणून घेऊया.

एअर फिल्टर स्वच्छ करा

एसीचा फिल्टर नियमितपणे स्वच्छ करणे आवश्यक आहे. फिल्टर खराब असल्यास एसीची कार्यक्षमता कमी होऊ शकते. त्यामुळे योग्य कूलिंगसाठी एसीला अधिक वेळ सुरू ठेवावा लागतो आणि परिणामी विजेचे बिलही वाढू शकते. तसेच आउटडोअर युनिट स्वच्छ ठेवणे आणि त्याची नियमित देखभाल करणेही तितकेच महत्त्वाचे आहे.

ड्राय मोड वापरा

मान्सूनच्या काळात एसी कूल मोडवर चालवल्यास हवेतली आर्द्रता कमी करण्यासाठी खोलीला गरजेपेक्षा जास्त थंड करावे लागते. त्यामुळे विजेचा वापर वाढतो आणि समस्येचे पूर्ण समाधानही मिळत नाही. अशावेळी ड्राय मोडचा वापर अधिक फायदेशीर ठरतो. बहुतांश नवीन एसीमध्ये ड्राय मोडची सुविधा उपलब्ध असते, जी विशेषतः आर्द्रता कमी करण्यासाठी तयार करण्यात आली आहे. हा मोड खोलीचे तापमान झपाट्याने कमी करण्याऐवजी हवेतली अतिरिक्त आर्द्रता कमी करण्यावर भर देतो. या मोडमध्ये कंप्रेसर सतत चालू राहत नाही, तर गरजेनुसार सुरू-बंद होत राहतो. त्यामुळे कूल मोडच्या तुलनेत कमी वीज खर्च होते.

आउटडोअर युनिटची काळजी घ्या

मान्सूनच्या काळात आउटडोअर युनिटमधून पाणी योग्य प्रकारे बाहेर जाण्याची व्यवस्था असणे आवश्यक आहे. युनिटच्या आसपास पावसाचे साचलेले पाणी किंवा ओल्या पानांचा कचरा नसावा, अन्यथा पाण्याचा निचरा व्यवस्थित होत नाही. जास्त आर्द्रतेमुळे एसीच्या इलेक्ट्रिकल पार्ट्सना नुकसान होऊ शकते आणि त्यामुळे एसीचे आयुष्यही कमी होऊ शकते.