RTX Spark चिपसह Microsoft Surface Laptop Ultra; प्रोफेशनल्ससाठी नवा पर्याय

Microsoft Surface Laptop Ultra ची घोषणा रविवारी करण्यात आली असून, हा कंपनीने आतापर्यंत तयार केलेला सर्वात शक्तिशाली Surface लॅपटॉप असल्याचा दावा करण्यात आला आहे. Nvidia च्या सहकार्याने विकसित करण्यात आलेला हा नवीन लॅपटॉप कंटेंट क्रिएटर्स, डेव्हलपर्स, AI संशोधक आणि व्यावसायिकांसाठी डिझाइन करण्यात आला आहे. Surface Laptop Ultra मध्ये Nvidia चे नवीनतम Blackwell RTX ग्राफिक्स आर्किटेक्चर, 128GB पर्यंत युनिफाइड मेमरी आणि पूर्ण CUDA सपोर्ट देण्यात आला आहे, ज्यामुळे मोठे AI मॉडेल्स, 3D रेंडरिंग, सॉफ्टवेअर कंपाइलिंग आणि जटिल सिम्युलेशन्ससारखी उच्च क्षमतेची कामे सहज हाताळता येतात.

Microsoft Surface Laptop Ultra ची उपलब्धता

Microsoft ने पुष्टी केली आहे की Surface Laptop Ultra यावर्षीच्या उत्तरार्धात बाजारात उपलब्ध होईल. मात्र, त्याची किंमत आणि विविध प्रदेशांमधील उपलब्धतेबाबत अद्याप माहिती जाहीर करण्यात आलेली नाही. हा लॅपटॉप Platinum आणि Nightfall या दोन रंग पर्यायांमध्ये उपलब्ध होणार आहे..

Microsoft Surface Laptop Ultra फीचर्स, स्पेसिफिकेशन्स

Microsoft Surface Laptop Ultra मध्ये 15-इंचाचा mini-LED PixelSense Ultra टचस्क्रीन डिस्प्ले देण्यात आला आहे, जो HDR मोडमध्ये 2,000 निट्सपर्यंत पीक ब्राइटनेस प्रदान करतो. या डिस्प्लेचा पिक्सेल डेन्सिटी 262ppi आहे आणि व्यावसायिक क्रिएटिव्ह कामांसाठी अत्यंत अचूक रंग पुनरुत्पादन देण्याचा दावा कंपनीने केला आहे. Microsoft च्या मते, Surface डिव्हाइसमध्ये आतापर्यंत देण्यात आलेला हा सर्वात तेजस्वी डिस्प्ले आहे.

या लॅपटॉपमध्ये Nvidia Blackwell RTX GPU देण्यात आला आहे. तसेच, पूर्ण Compute Unified Device Architecture (CUDA) सपोर्ट असलेले हे पहिले Surface डिव्हाइस असल्याचा दावा कंपनीने केला आहे. कंपनीच्या माहितीनुसार, हा लॅपटॉप 1 पेटाफ्लॉपपर्यंत AI कॉम्प्युट परफॉर्मन्स देऊ शकतो. त्यामुळे वापरकर्ते स्थानिक स्तरावर 120 अब्ज पॅरामीटर्सपर्यंतचे AI मॉडेल्स चालवू शकतात.

Surface Laptop Ultra मध्ये 128GB पर्यंत युनिफाइड मेमरी कॉन्फिगर करता येते. ही मेमरी वर्कलोडनुसार CPU आणि GPU दरम्यान सिस्टम संसाधनांचे डायनॅमिक वाटप करू शकते. कंपनीच्या मते, हे हार्डवेअर Nvidia RTX Spark वर्कलोड्स आणि पुढील पिढीतील Windows AI अनुभवांसाठी विशेषतः ऑप्टिमाइझ करण्यात आले आहे.

विशेष म्हणजे, RTX Spark हा Nvidia चा नवीन सुपरचिप असून त्यामध्ये Blackwell RTX GPU, 6,144 CUDA कोअर्स, पाचव्या पिढीचे Tensor कोअर्स आणि 20-कोअर Nvidia Grace CPU यांचा समावेश आहे.

दीर्घकाळ उच्च परफॉर्मन्स टिकवून ठेवण्यासाठी Surface Laptop Ultra मध्ये प्रगत थर्मल सिस्टम देण्यात आली आहे. कंपनीच्या मते, याची थर्मल क्षमता 15-इंच Surface Laptop (7th Edition) च्या तुलनेत 2.5 पट जास्त आहे. कनेक्टिव्हिटीसाठी यामध्ये HDMI पोर्ट, USB Type-C पोर्ट्स, USB Type-A पोर्ट, SD कार्ड स्लॉट आणि 3.5mm हेडफोन जॅक देण्यात आला आहे.

या लॅपटॉपमध्ये Microsoft चा आतापर्यंतचा सर्वात मोठा हॅप्टिक टचपॅड देण्यात आला आहे आणि फेसियल रिकग्निशनसाठी Windows Hello सपोर्ट देखील उपलब्ध आहे. तसेच, दुरुस्ती सुलभ व्हावी यासाठी या लॅपटॉपची रचना करण्यात आली असून, अंतर्गत मार्गदर्शक चिन्हे आणि स्वतंत्रपणे खरेदी करता येणारे रिप्लेसमेंट पार्ट्सही उपलब्ध असतील, असे Microsoft ने सांगितले आहे.