गूगलने Gmail अ‍ॅड्रेस बदलण्याची सुविधा सुरू केली; अमेरिकेत रोलआउटला सुरुवात

गुगलने मंगळवारी एक महत्त्वपूर्ण अपडेट जाहीर केले असून, आता वापरकर्त्यांना त्यांचा प्राथमिक Gmail अ‍ॅड्रेस बदलण्याची सुविधा मिळणार आहे. यापूर्वी खाते तयार केल्यानंतर मुख्य Gmail अ‍ॅड्रेस बदलण्याची परवानगी गुगल देत नव्हते, त्यामुळे हा मोठा बदल मानला जात आहे.
माउंटन व्ह्यू-स्थित या टेक कंपनीनुसार, ही सुविधा वापरकर्त्याच्या संपूर्ण Google अकाउंटवर लागू होईल, ज्यामध्ये Gmail, Google Calendar, Google Photos आणि Google Drive सारख्या सेवांचा समावेश आहे. मात्र, सध्या ही सुविधा केवळ अमेरिकेतील वापरकर्त्यांसाठीच उपलब्ध करून दिली जात आहे.

कंपनीने विशेष म्हणजे, डिसेंबर 2025 मध्ये या सुविधेची पहिली झलक दिली होती, जेव्हा त्यांनी त्यांच्या सपोर्ट पेजमध्ये Gmail पत्ता बदलण्याच्या क्षमतेचा उल्लेख केला होता. मात्र, त्या वेळी ही सुविधा अद्याप वापरकर्त्यांसाठी उपलब्ध करण्यात आलेली नव्हती.

Gmail Address  बदलणे

या अपडेटसह, वापरकर्ते नवीन @gmail.com पत्त्यावर स्विच करू शकतात. याचा अर्थ असा की, त्यांच्या जुन्या अॅड्रेसवर पाठवलेले ईमेल त्यांना मिळत राहतील आणि ते तो पत्ता साइन-इन करण्यासाठी किंवा ईमेल पाठवण्यासाठी वापरू शकतील. Googleच्या म्हणण्यानुसार, वापरकर्ते वर्षातून एकदाच आपला ईमेल अॅड्रेस बदलू शकतात आणि एकूण तीन वेळा ही सुविधा वापरता येते. या प्रक्रियेदरम्यान सर्व ईमेल, डेटा आणि अकाउंटचा इतिहास सुरक्षित राहील.

गरज पडल्यास ते नंतर त्यांच्या जुन्या ईमेल अॅड्रेसवर पुन्हा परत जाऊ शकतात.

एकदा वापरकर्त्याने नवीन Gmail अॅड्रेस निवडल्यानंतर, त्यांचा विद्यमान पत्ता ‘अ‍ॅलियास' म्हणून वापरला जाईल, असे कंपनीने सांगितले आहे. सर्व संपर्क, Drive वरील फाइल्स, ईमेल्स, फोटो, खरेदी आणि सबस्क्रिप्शन्स सुरक्षित राहतील. तसेच Gmail, Drive, YouTube आणि Maps सारख्या सेवांसाठी विद्यमान साइन-इन प्रवेशावर कोणताही परिणाम होणार नाही, हेही कंपनीने स्पष्ट केले आहे.

ही सुविधा विशेषतः जुन्या Gmail वापरकर्त्यांसाठी उपयुक्त ठरण्याची अपेक्षा आहे, ज्यांना त्यांच्या जुन्या किंवा कमी व्यावसायिक वाटणाऱ्या ईमेल आयडीपासून दूर जायचे आहे. आतापर्यंत, Gmail मध्ये अलियास (aliases) आणि अतिरिक्त ईमेल अॅड्रेस वापरण्याची सुविधा होती, पण मुख्य (primary) अकाउंटचा ईमेल अॅड्रेस बदलण्याची सुविधा उपलब्ध नव्हती.

 Gmail Address कसा बदलायचा:

1. तुमच्या Android किंवा iOS डिव्हाइसवर myaccount.google.com/google-account-email या साइटवर जा आणि आवश्यक असल्यास साइन इन करा.
2. पानाच्या वरच्या बाजूला Personal info (वैयक्तिक माहिती) वर टॅप करा.
3. Email वर टॅप करा आणि नंतर Google Account email निवडा.
4. Google Account email अंतर्गत Change Google Account email वर टॅप करा.
5. तुम्हाला हवा असलेला नवीन युजरनेम टाइप करा. तो उपलब्ध असावा आणि यापूर्वी वापरलेला किंवा डिलीट केलेला नसावा.
6. Change email वर टॅप करा, त्यानंतर Yes, change email निवडा.
7. सूचनांनुसार प्रक्रिया पूर्ण करा. प्रक्रिया पूर्ण झाल्यावर, तुमचा नवीन Gmail अ‍ॅड्रेस हा मुख्य (primary) ईमेल बनेल, आणि जुना अ‍ॅड्रेस पर्यायी (alternate) ईमेल म्हणून राहील.

तथापि, Google ने नमूद केले आहे की नवीन Gmail पत्त्यावर स्विच केल्यास Google च्या सेवा आणि फीचर्स वापरताना काही अडचणी येऊ शकतात. जे वापरकर्ते Chromebooks, Google Convenience साइन-इन आणि Remote Desktop वापरतात, त्यांनी सपोर्ट पेजवर दिलेल्या काही अतिरिक्त स्टेप्सचे पालन करणे आवश्यक आहे.