“आम्ही फोल्डेबल फॉर्म फॅक्टरचे खरे पायोनियर्स आहोत. हिंग डिझाइन करण्याचा आमचा अनुभव अतुलनीय आहे,” असे ते म्हणाले. या फोनमध्ये स्टेनलेस स्टील मेकॅनिझमसह तयार केलेला हिंग देण्यात आला आहे, तर मजबूत रचना टिकवण्यासाठी फ्रेम अॅल्युमिनियमची बनवण्यात आली आहे.
याशिवाय, फोनच्या आतील डिस्प्लेच्या खाली टायटॅनियम प्लेट देण्यात आली आहे, जी दीर्घकाळ वापरानंतर डिस्प्लेवर क्रीज किंवा विकृती येऊ नये यासाठी मदत करते. “डिस्प्लेच्या खाली आम्ही सपोर्टसाठी टायटॅनियम प्लेट वापरली आहे. त्यामुळे इंजिनिअरिंगचे सर्व भाग एकत्र येऊन उत्तम अनुभव मिळेल, याची आम्ही खात्री केली,” असे रंजन यांनी सांगितले.
स्नॅपड्रॅगन ८ Gen ५ प्रोसेसरची निवड Elite व्हेरिएंटऐवजी का करण्यात आली, यावर रंजन म्हणाले की हा अधिक रणनीतिक निर्णय होता. “याच्या वर फक्त एकच चिपसेट आहे आणि तो म्हणजे स्नॅपड्रॅगन ८ Elite. जर आम्हाला वाटले असते की स्नॅपड्रॅगन ८ Gen ५ वर काही गोष्टी प्रभावीपणे करता येणार नाहीत, तर आम्ही नक्कीच Elite ची निवड केली असती. पण आमच्या मते स्नॅपड्रॅगन ८ Gen ५ हा अत्यंत सक्षम आणि पूर्ण फ्लॅगशिप चिपसेट आहे, जो सर्व कामे प्रभावीपणे करू शकतो,” असे त्यांनी स्पष्ट केले.
विशेष म्हणजे, कंपनीने यावर्षी सादर केलेल्या “सिग्नेचर” स्मार्टफोनमधील काही फीचर्स, जसे प्रोसेसर आणि कॅमेरे, या फोनमध्ये वापरले आहेत. “आम्ही सिग्नेचरमध्ये वापरलेलाच चिपसेट येथे दिला आहे. त्याचबरोबर समान कॅमेरा सेन्सर्सवर आधीच काम करून त्यांचे ट्युनिंग केले होते आणि त्यातून DxO Mark मध्ये जागतिक टॉप १० स्कोअर मिळवला होता. त्यामुळेच आम्हाला हा जगातील सर्वोत्तम फोल्डेबल कॅमेरा फोन बनवता आला,” असे रंजन यांनी सांगितले.
हार्डवेअरच्या पलीकडची स्पर्धा
बुक-स्टाइल फोल्डेबल स्मार्टफोन बाजारात स्पर्धा दिवसेंदिवस तीव्र होत आहे आणि सध्या सॅमसंग आघाडीवर आहे. मात्र, रंजन यांच्या मते Motorola Razr Fold हा केवळ स्पर्धेसाठी तयार करण्यात आलेला नाही. त्यांच्या म्हणण्यानुसार, हा फोन ग्राहकांच्या अभिप्रायातून आणि बाजारातील अनुभवातून विकसित करण्यात आला आहे.
“आम्ही याआधी स्वतःचा बुक-स्टाइल फोल्डेबल तयार केला नव्हता. पण ग्राहकांचे अभिप्राय आम्ही सातत्याने ऐकत होतो. त्यातून आम्हाला या संपूर्ण कॅटेगरीतील मुख्य समस्या समजल्या, फक्त एखाद्या एक-दोन ब्रँडच्या नव्हे,” असे ते म्हणाले.
रंजन यांच्या मते, फोल्डेबल फोनमध्ये कॅमेरा परफॉर्मन्स आणि बॅटरी या दोन गोष्टींमध्ये मोठी कमतरता होती. “लोक फोल्डेबल फोन घेत असले तरी त्यांना दुसरा फोन जवळ ठेवावा लागत होता. या कॅटेगरीतील डिव्हाइसेस त्या पातळीची क्षमता देत नव्हत्या. फोल्डेबल म्हणजे उत्कृष्ट कॅमेरा अनुभव नव्हता, उत्तम बॅटरी नव्हती आणि टिकाऊपणाबाबत नेहमीच चिंता होती. या सर्व समस्या आम्ही या डिव्हाइसद्वारे सोडवल्या आहेत,” असे त्यांनी सांगितले.
कंपनीने या सर्व समस्यांवर उपाय करणारा बुक-स्टाइल फोल्डेबल तयार करण्यासाठी बराच वेळ घेतला. “The Godfather मध्ये म्हटल्याप्रमाणे — त्यांना असा प्रस्ताव द्या, जो ते नाकारू शकणार नाहीत. हा तोच प्रस्ताव आहे. म्हणूनच आम्ही याला ‘Flawless Fold' म्हणतो,” असे रंजन म्हणाले.
प्रीमियम पोर्टफोलिओचा विस्तार
Razr Fold च्या लॉन्चमुळे आता हे स्पष्ट झाले आहे की Motorola २०२६ मध्ये प्रीमियम सेगमेंटमध्ये मोठी झेप घेण्याच्या तयारीत आहे. रंजन यांनी सांगितले की जागतिक स्तरावर “Edge” आणि “Razr” सिरीजमधून कंपनीच्या महसुलात तब्बल ३० टक्क्यांपर्यंत वाढ झाली आहे. मात्र, आशिया-पॅसिफिक प्रदेशात ही वाढ आणखी मोठी आहे.
“आशिया-पॅसिफिक प्रदेशात Motorola च्या एकूण महसुलातील प्रीमियम विभागाचा वाटा आता ५० टक्क्यांपेक्षा जास्त झाला आहे,” असे रंजन यांनी सांगितले.
