Apple Watch ने वाचवला जीव! पडताच आपोआप लागला Emergency CallApple Watch ने वाचवला जीव! पडताच आपोआप लागला Emergency Call

Apple Watch हेल्थ आणि सेफ्टी फीचर्समुळे पुन्हा एकदा एका व्यक्तीचा जीव वाचवण्याची घटना घडली आहे. अमेरिकेतील ओहायो राज्यातील सिनसिनाटी शहरात राहणारे मोहम्मद इस्लाम यांनी सांगितले की, त्यांच्या Apple Watch मधील Fall Detection फीचरने आपोआप 911 वर कॉल केला नसता, तर कदाचित त्यांचा जीव वाचला नसता. रुग्णालयातील तपासणीत डॉक्टरांनी त्यांच्या फुफ्फुसांमध्ये रक्ताच्या गुठळ्या (Blood Clots) असल्याची पुष्टी केली.

Local 21 या मीडियासोबत मोहम्मद इस्लाम यांनी घटनाक्रम सांगितला की, ते घराबाहेर कचरा टाकण्यासाठी गेले होते. त्याच वेळी ते अचानक बेशुद्ध होऊन जमिनीवर कोसळले. शुद्धीवर आल्यानंतर त्यांनी उठण्याचा प्रयत्न केला, मात्र त्यांना उभे राहता आले नाही. काही वेळाने त्यांना सायरनचा आवाज ऐकू आला. प्रत्यक्षात, त्यांच्या Apple Watch ने ते पडल्याचे ओळखताच आपोआप 911 आपत्कालीन सेवेला अलर्ट पाठवला होता.

त्यानंतर वैद्यकीय पथक घटनास्थळी पोहोचले आणि त्यांना University of Cincinnati Medical Center येथे दाखल करण्यात आले. रुग्णालयातील तपासणीत डॉक्टरांना त्यांच्या फुफ्फुसांमध्ये रक्ताच्या गुठळ्या आढळल्या. सध्या त्यांना औषधांसह घरी पाठवण्यात आले आहे. मात्र, त्यांच्या शरीरात रक्ताच्या गुठळ्या नेमक्या कशामुळे तयार झाल्या, हे डॉक्टरांना अद्याप समजू शकलेले नाही.

मोहम्मद इस्लाम यांनी माध्यमांशी बोलताना सांगितले की, त्यांना Apple Watch त्यांच्या मुलींनी भेट म्हणून दिले होते. त्यांच्या मुली त्यांना नेहमी विचारायच्या की त्यांनी Apple Watch घातले आहे का. या घटनेनंतर कुटुंबाचे म्हणणे आहे की, हेच गिफ्ट त्यांच्या जीवाचे रक्षण करणारा ठरला.

मोहम्मद इस्लाम यांनी सांगितले की, त्यांनी स्वतःहून Fall Detection फीचर सुरू केले नव्हते. मात्र, त्यांचे वय 55 वर्षांपेक्षा जास्त असल्याने हे फीचर आपोआप सक्रिय झाले होते. यापूर्वी त्यांना अनेकदा चुकीचे (False) अलर्ट मिळाले होते. पण गरज पडल्यास Apple Watch कोणत्याही हस्तक्षेपाशिवाय थेट 911 वर कॉल करू शकते, याची त्यांना कल्पना नव्हती.

Apple ने Fall Detection फीचरची सुरुवात 2018 मध्ये Apple Watch Series 4 सोबत केली होती. हे फीचर वापरकर्ता जमिनीवर पडल्याचे ओळखते आणि काही काळ त्याच्याकडून कोणतीही प्रतिक्रिया मिळाली नाही, तर ते आपोआप आपत्कालीन सेवा आणि गरज वाटल्यास आपत्कालीन संपर्कांनाही अलर्ट पाठवते.

गेल्या काही वर्षांत Apple Watch मधील Fall Detection, Crash Detection आणि Heart Rate Monitoring यांसारख्या फीचर्समुळे अनेक लोकांचे जीव वाचले आहेत. रस्ते अपघात, डोंगराळ भागातील दुर्घटना तसेच गंभीर आरोग्यविषयक समस्यांच्या वेळी या फीचर्सनी वेळेवर आपत्कालीन सेवांना अलर्ट पाठवून महत्त्वाची मदत केली आहे.