कारमध्ये हे डिव्हाइस नसल्यास मोठं नुकसान होऊ शकतं! CP PLUS ने आणलं नवं 4G Dashcam

CP PLUS ने भारतीय बाजारात आपली नवीन CarKam 4G Dashcam Series लॉन्च केली आहे. कंपनीने या सिरीजअंतर्गत CP-H27 आणि CP-H27B मॉडेल्स सादर केले आहेत. हे डॅशकॅम अशा वापरकर्त्यांसाठी तयार करण्यात आले आहेत, जे कारमधील ड्रायव्हिंग रेकॉर्डिंगसोबतच रिमोट मॉनिटरिंग आणि सिक्युरिटी फीचर्सचीही अपेक्षा ठेवतात. दोन्ही मॉडेल्स 4G कनेक्टिव्हिटी, GPS ट्रॅकिंग आणि ezyLiv+ अॅप सपोर्टसह येतात. तर CP-H27B मध्ये फ्रंट आणि रिअर असे दोन्ही कॅमेरे देण्यात आले आहेत, ज्यामुळे वाहनाच्या पुढील आणि मागील बाजूची रेकॉर्डिंग एकाच वेळी करता येते.

नवीन CarKam 4G सिरीजमध्ये 4G/5G SIM सपोर्ट देण्यात आला आहे. याच्या मदतीने वापरकर्ते ezyLiv+ मोबाइल अॅपद्वारे लाईव्ह व्ह्यू, रिमोट अॅक्सेस आणि वाहनाचे लोकेशन ट्रॅक करू शकतात. याशिवाय दोन्ही मॉडेल्समध्ये HDR सपोर्ट, H.265 व्हिडिओ कॉम्प्रेशन आणि 1TB पर्यंतच्या microSD कार्डचा सपोर्ट देण्यात आला आहे.

डॅशकॅममध्ये बिल्ट-इन GPS, टू-वे टॉक, मोशन डिटेक्शन, कोलिजन डिटेक्शन, G-Sensor आणि पार्किंग मॉनिटरिंग यांसारखी फीचर्सही देण्यात आली आहेत. Type-C हार्डवायर किट सोबत वापरल्यास टाइम-लॅप्स रेकॉर्डिंग आणि पार्किंग मोड देखील कार्यरत होतो.

CP-H27 आणि CP-H27B मध्ये काय आहे फरक?

CP-H27 मध्ये 2 मेगापिक्सेलचा Full HD फ्रंट कॅमेरा देण्यात आला आहे, जो 1080p रिझोल्यूशनमध्ये व्हिडिओ रेकॉर्डिंग करतो. यामध्ये F1.5 अपर्चर लेन्स आणि 136 अंशांचा डायगोनल व्ह्यूइंग अँगल मिळतो.

तर CP-H27B हे ड्युअल-चॅनेल सेटअपसह येते. यामध्ये 2 मेगापिक्सेलचा Full HD फ्रंट कॅमेरा आणि 2 मेगापिक्सेलचा Full HD रिअर कॅमेरा देण्यात आला आहे. त्यामुळे कारच्या पुढील आणि मागील दोन्ही दिशांची रेकॉर्डिंग एकाच वेळी करता येते. दोन्ही कॅमेरे 1080p व्हिडिओ रेकॉर्डिंगला सपोर्ट करतात.

किंमत आणि उपलब्धता

CP PLUS ने CarKam 4G CP-H27 ची किंमत 7,599 रुपये ठेवली आहे. तर CP-H27B ची किंमत 11,699 रुपये आहे. हे दोन्ही डॅशकॅम भारतात Amazon वर विक्रीसाठी उपलब्ध आहेत.