18 दिवसांची बॅटरी, ऑफलाइन मॅप्ससह Haylou Watch Hyper स्मार्टवॉच लॉन्च; किंमत जाणून घ्या

Haylou ने आपले नवीन Watch Hyper स्मार्टवॉच बाजारात सादर केले आहे. हे कंपनीचे परवडणाऱ्या किमतीतील स्मार्टवॉच असून यामध्ये अनेक खास फीचर्स देण्यात आले आहेत. यात 1.97 इंचाचा AMOLED डिस्प्ले आहे. स्क्रीनमध्ये अॅडॅप्टिव्ह ब्राइटनेस सपोर्ट देण्यात आला आहे. म्हणजेच उन्हात गेल्यावर डिस्प्लेची ब्राइटनेस आपोआप वाढते. हे स्मार्टवॉच अनेक हेल्थ फीचर्ससह सुसज्ज आहे. यामध्ये 390mAh बॅटरी देण्यात आली असून ती एका चार्जमध्ये 18 दिवसांपर्यंत चालू शकते, असा दावा कंपनीने केला आहे. चला जाणून घेऊया या स्मार्टवॉचमध्ये आणखी कोणते खास फीचर्स आहेत आणि त्याची किंमत किती आहे.

Haylou Watch Hyper किंमत 

Haylou Watch Hyper स्मार्टवॉचची किंमत 85 डॉलर ( 8,000 रुपये) ठेवण्यात आली आहे. कंपनीने हे स्मार्टवॉच जागतिक बाजारात लॉन्च केले असून ते अधिकृत वेबसाइटवर लिस्ट करण्यात आले आहे. हे ब्लॅक आणि सिल्व्हर या दोन रंगांच्या पर्यायांमध्ये उपलब्ध आहे.

Haylou Watch Hyper स्पेसीफिकेशन

Haylou Watch Hyper मध्ये 1.97 इंचाचा AMOLED डिस्प्ले देण्यात आला आहे. स्क्रीनमध्ये अॅडॅप्टिव्ह ब्राइटनेस फीचर आहे, मात्र कंपनीने त्याची कमाल ब्राइटनेस किती आहे याची माहिती दिलेली नाही. यामध्ये अनेक हेल्थ फीचर्स देण्यात आले आहेत. हे हार्ट रेट सेन्सरसह येते. कंपॅनियन अॅपच्या मदतीने हे हेल्थ डेटा संकलित करते. याशिवाय हे तणावाची पातळी (Stress Level), रक्तातील ऑक्सिजनची पातळी (SpO2) देखील मोजू शकते. तसेच हे VO2 Max ट्रॅकिंगला सपोर्ट करते. स्मार्टवॉचमध्ये स्लीप ट्रॅकिंग फीचरही देण्यात आले आहे.

यामध्ये ड्युअल-बँड GPS कनेक्टिव्हिटी देण्यात आली आहे. हे L1 + L5 पोझिशनिंग सिस्टमसह येते, ज्यामुळे अत्यंत अचूक लोकेशन ट्रॅकिंग मिळते, असा दावा कंपनीने केला आहे. या स्मार्टवॉचमध्ये ऑफलाइन मॅप्सचाही सपोर्ट उपलब्ध आहे. याची बॅटरीदेखील याचे प्रमुख आकर्षण आहे.

या वेअरेबलमध्ये 390mAh बॅटरी देण्यात आली आहे. कंपनीचा दावा आहे की ती एका चार्जमध्ये 18 दिवसांपर्यंत चालते. तर GPS सुरू असताना 24 तासांपर्यंत बॅटरी बॅकअप मिळतो. यामध्ये 170 पेक्षा जास्त स्पोर्ट्स मोड्स देण्यात आले आहेत. तसेच हे 5ATM वॉटर रेसिस्टन्सला सपोर्ट करते.