हीटवेव्हचा AI उद्योगाला इशारा! डेटा सेंटर्सवर वाढतंय संकट

AI च्या वाढत्या मागणीदरम्यान उष्णतेचे संकट; डेटा सेंटर्ससमोर नवे आव्हान. AI ची वाढती मागणी लक्षात घेता जगभरात मोठ्या प्रमाणावर डेटा सेंटर्स वेगाने उभारले जात आहेत. मात्र, आता त्यांच्यासमोर एक नवे आव्हान उभे राहिले आहे. वाढते तापमान आणि वारंवार येणाऱ्या उष्णतेच्या लाटा (हीटवेव्ह) AI डेटा सेंटर्ससाठी मोठा धोका ठरत आहेत. एका अहवालानुसार, अत्यंत उच्च तापमानामुळे डेटा सेंटर्सची कूलिंग सिस्टीम, वीजपुरवठा आणि एकूण ऑपरेशन्सवर परिणाम होऊ शकतो. त्यामुळेच आता मोठ्या टेक कंपन्या आपल्या डेटा सेंटर्सच्या डिझाइन आणि कूलिंग सिस्टीममध्ये बदल करत आहेत.

AI डेटा सेंटर्ससाठी उष्णता का ठरत आहे धोका?

CNBC च्या अहवालानुसार, AI डेटा सेंटर्समध्ये वापरल्या जाणाऱ्या हाय-परफॉर्मन्स चिप्स सतत मोठ्या प्रमाणात उष्णता निर्माण करतात. त्यांना थंड ठेवण्यासाठी सामान्य परिस्थितीतही डेटा सेंटरच्या एकूण वीज वापरापैकी सुमारे 40% वीज केवळ कूलिंगसाठी खर्च होते. मात्र, बाहेरील तापमान मोठ्या प्रमाणात वाढल्यास कूलिंगची गरज आणखी वाढते. त्याच वेळी एअर कंडिशनिंगमुळे वीज ग्रीडवर अतिरिक्त ताण येतो, ज्यामुळे वीज खंडित होण्याचा धोका वाढतो.

हवामान बदलामुळे वाढत आहे धोका

क्लायमेट रिस्क अॅनालिटिक्स कंपनी First Street च्या अभ्यासानुसार, जगातील सुमारे 79% डेटा सेंटर क्षमता अशा भागांमध्ये आहे, पूर, जंगलातील आग, वेगवान वारे आणि तीव्र उष्णता यांसारखे हवामानाशी संबंधित धोके आहेत. यामुळे केवळ ऑपरेशन्सवर परिणाम होत नाही, तर विमा आणि दुरुस्तीचा खर्चही वाढू शकतो.

Marsh Risk चे डिजिटल इन्फ्रास्ट्रक्चर लीड जो मेसेजॅक यांनी CNBC ला सांगितले, "आता प्रश्न हा नाही की हवामानाशी संबंधित धोके डेटा सेंटर्सवर परिणाम करतील की नाही, तर कंपन्या हे धोके कसे प्रभावीपणे ओळखतात आणि त्यांचे व्यवस्थापन करतात,हे पाहणे महत्वाचे आहे."

नवे डेटा सेंटर्स आता अधिक धोकादायक भागांमध्ये

Zurich Insurance चे इंटरनॅशनल कन्स्ट्रक्शन प्रमुख पॅट्रिक मॅकब्राइड यांच्या मते, आता सुमारे 64% नवे डेटा सेंटर्स पारंपरिक ठिकाणांऐवजी इतर भागांमध्ये उभारले जात आहेत. या भागांमध्ये तीव्र उष्णता, वादळे, गारपीट आणि वेगवान वाऱ्यांचा धोका अधिक असतो.

त्यांनी सांगितले, "खराब हवामानाकडे आता दुर्लक्ष करता येणार नाही. डेटा सेंटरचे डिझाइन करताना हवामान हा सर्वात महत्त्वाच्या घटकांपैकी एक बनला आहे."

टेक कंपन्या कशी करत आहेत तयारी?

अहवालानुसार, Microsoft बदलत्या हवामानाचा विचार करून आपल्या डेटा सेंटर्सचे डिझाइन तयार करत आहे. कंपनीच्या मते, योग्य ठिकाणाची निवड, रिअल-टाइम मॉनिटरिंग आणि बॅकअप सिस्टीमच्या मदतीने अत्यंत उष्णता आणि खराब हवामानाचा परिणाम कमी करण्याचा प्रयत्न केला जात आहे.

तर Nvidia ने अलीकडेच सांगितले की, त्यांचे नवे AI सर्व्हर्स आता 45 अंश सेल्सियसपर्यंतच्या कूलिंग लिक्विड तापमानातही कार्य करू शकतात. कंपनीच्या मते, चिलरचे तापमान केवळ 1 अंशाने वाढवल्यास कूलिंगवरील ऊर्जा खर्चात सुमारे 4% पर्यंत बचत होऊ शकते.

भविष्यात बदलू शकतात डेटा सेंटर्स

अहवालानुसार, आता डेटा सेंटर ऑपरेटर्स अशा कूलिंग सिस्टीम आणि डिझाइनवर काम करत आहेत, जे भविष्यात वाढत्या तापमानातही AI इन्फ्रास्ट्रक्चर सुरक्षित ठेवतील आणि त्याचे कामकाज अखंड सुरू राहील याची खात्री देतील. तज्ज्ञांचे मत आहे की, AI डेटा सेंटर उद्योगात वेगाने होत असलेले नवोपक्रम येत्या काळात हवामान बदलामुळे निर्माण होणाऱ्या धोक्यांचा सामना करण्यासाठी महत्त्वाची भूमिका बजावतील.