वाहतूक पोलिसांसमोर मोबाईलमधील Virtual DL चालणार का? जाणून घ्या नियम

देशात कार, बाईक किंवा स्कूटर चालवण्यासाठी ड्रायव्हिंग लायसन्स असणे अनिवार्य आहे. डिजिटल पेमेंटच्या या युगात अनेकजण अनेकदा वॉलेट सोबत ठेवणे विसरतात. अशा वेळी रस्त्यात ट्रॅफिक पोलिसांनी अडवून ड्रायव्हिंग लायसन्स मागितले तर काय होईल?  ड्रायव्हिंग लायसन्स घरी विसरता, अशावेळी तुमच्यावर दंडात्मक कारवाई म्हणजेच चलान देणे आवश्यक असते. मात्र, अशा परिस्थितीपासून बचाव करण्यासाठी तंत्रज्ञान तुम्हाला योग्य वेळी मदत करू शकते. तुम्ही तुमच्या ड्रायव्हिंग लायसन्स व्हर्च्युअल प्रत फोनमध्ये सुरक्षित ठेवू शकता. याबद्दल सविस्तर जाणून घेऊया.

व्हर्च्युअल ड्रायव्हिंग लायसन्स

तुम्ही ड्रायव्हिंग लायसन्सची व्हर्च्युअल प्रत सहजपणे फोनमध्ये ठेवू शकता. यासाठी दोन सरकारी अॅप्सचा वापर करता येतो आणि या अॅप्समधील डिजिटल प्रत कायदेशीरदृष्ट्या वैध मानली जाते. पहिले अॅप DigiLocker आणि दुसरे NextGen mParivahan आहे. या अॅप्समध्ये ड्रायव्हिंग लायसन्स सेव्ह करून ठेवल्यास लायसन्स घरी विसरल्याची चिंता राहत नाही. मात्र, या अॅप्सव्यतिरिक्त जर तुम्ही फक्त फोनमध्ये लायसन्सचा फोटो किंवा PDF सेव्ह केला असेल, तर ट्रॅफिक पोलिस त्याला वैध मानणार नाहीत.

एकदा या अॅप्समध्ये ड्रायव्हिंग लायसन्सची व्हर्च्युअल प्रत सेव्ह केल्यानंतर तुम्हाला ती कायमस्वरूपी उपलब्ध राहते. त्यामुळे वॉलेट घरी राहिले तरी ट्रॅफिक पोलिसांनी ड्रायव्हिंग लायसन्स मागितल्यास कोणतीही अडचण येत नाही.

DigiLocker वर ड्रायव्हिंग लायसन्स कसे ठेवावे

फोनमध्ये DigiLocker अॅप उघडा किंवा App Store/Google Play Store वरून डाउनलोड करा.
अॅपमध्ये आधार कार्ड किंवा मोबाइल क्रमांकाच्या मदतीने लॉगिन करा.
त्यानंतर सर्चमध्ये Ministry of Road Transport and Highways असे टाइप करून शोधा आणि त्यावर क्लिक करा.
उपलब्ध पर्यायांमधून Driving Licence निवडा.
आता तुमचा ड्रायव्हिंग लायसन्स क्रमांक आणि जन्मतारीख प्रविष्ट करा.
त्यानंतर Get Document वर क्लिक करा.
यानंतर ड्रायव्हिंग लायसन्स अॅपमध्ये फेच होऊन Issued Documents विभागात दिसेल.
यानंतर इंटरनेटशिवायही अॅप उघडून ट्रॅफिक पोलिस किंवा इतर संबंधित अधिकाऱ्यांना ड्रायव्हिंग लायसन्स सहज दाखवू शकता.

NextGen mParivahan वर ड्रायव्हिंग लायसन्स कसे ठेवावे

सर्वप्रथम फोनमध्ये NextGen mParivahan अॅप उघडा किंवा App Store/Google Play Store वरून डाउनलोड करा.
त्यानंतर अॅपमध्ये खाते तयार करा आणि मोबाइल क्रमांक नोंदवा. मोबाइलवर आलेल्या OTP च्या मदतीने लॉगिन करा.
आता अॅपच्या होमपेजवर जाऊन Driving Licence या पर्यायावर क्लिक करा.
यानंतर सर्च बारमध्ये तुमचा ड्रायव्हिंग लायसन्स क्रमांक आणि जन्मतारीख प्रविष्ट करा.
सर्व माहिती भरल्यानंतर Search बटणावर टॅप करा. त्यानंतर स्क्रीनवर तुमच्या ड्रायव्हिंग लायसन्सची माहिती दिसेल.
यानंतर माहितीखालील Add to Dashboard किंवा Create Virtual DL या पर्यायावर क्लिक करा.
त्यानंतर फोनवर आलेला OTP प्रविष्ट करा.
व्हेरिफिकेशन पूर्ण झाल्यानंतर तुमचे Virtual DL तयार होईल आणि अॅपच्या डॅशबोर्डमध्ये दिसेल.
यानंतर इंटरनेटशिवायही NextGen mParivahan अॅपमधील डॅशबोर्ड विभागातून तुमचे व्हर्च्युअल ड्रायव्हिंग लायसन्स सहज दाखवू शकता.