E85 फ्यूलबाबत संभ्रम? जाणून घ्या सर्व प्रश्नांची उत्तरं

देशात सध्या E85 इंधनाची मोठ्या प्रमाणावर चर्चा सुरू आहे. सरकारचा दावा आहे की हे सामान्य पेट्रोलपेक्षा स्वस्त आहे. मात्र वाहनचालकांच्या मनात अनेक प्रश्न आहेत. त्यांच्या वाहनांमध्ये हे इंधन चालेल का, देशात अशी वाहने उपलब्ध आहेत का, E20 मानकांचे पालन करणाऱ्या वाहनात E85 इंधन भरल्यास काय होईल, ते सुरक्षित आहे का? सरकारने आता हाय इथेनॉल मिश्रणाच्या इंधनाची घोषणा केली आहे, त्यामुळे सामान्य पेट्रोलवर चालणारी कार खरेदी करणे योग्य ठरेल का? आज आपण अशाच अनेक प्रश्नांवर चर्चा करत आहोत, जे प्रत्येक वाहनचालकासाठी जाणून घेणे अत्यंत महत्त्वाचे आहे.

भारतात 5 जून रोजी केंद्रीय पेट्रोलियम आणि नैसर्गिक वायू मंत्री हरदीप सिंह पुरी यांनी दिल्लीतील इंडियन ऑयलच्या पूसा रोड पंपावर दिल्लीतील पहिल्या E85 इंधन वितरण केंद्राचे उद्घाटन केले. यामुळे देशाच्या राजधानीत हाय इथेनॉल इंधनाचा वापर सुरू झाल्याचे स्पष्ट झाले आहे. E85 इंधनाच्या सुरुवातीमुळे भारताचा इथेनॉल मिश्रण प्रोग्राम आता नव्या टप्प्यावर पोहोचला आहे.

सामान्य पेट्रोलपेक्षा किती स्वस्त?

दिल्लीमध्ये E85 पेट्रोलची किंमत 82.12 रुपये प्रति लिटर आहे, जी सध्या उपलब्ध असलेल्या E20 पेट्रोलपेक्षा सुमारे 20 रुपये कमी आहे. पेट्रोल पंपांवर कोणताही गोंधळ टाळण्यासाठी E85 साठी स्वतंत्र ब्रँडिंग आणि लेबलिंग असलेले पंप उपलब्ध असतील.

E20 वाहनांमध्ये E85 इंधन चालेल का?

E20 इंधनासाठी डिझाइन आणि प्रमाणित केलेली वाहने 20 टक्क्यांपर्यंत इथेनॉल असलेल्या पेट्रोलवर सुरक्षितपणे चालण्यासाठी तयार केली जातात. दुसरीकडे, E85 मध्ये 85 टक्क्यांपर्यंत इथेनॉल असते, त्यामुळे ते पूर्णपणे वेगळे इंधन ठरते. अशा परिस्थितीत E20 वाहनांमध्ये E85 इंधन वापरता येणार नाही.

E85 इंधन भरल्यास काय होईल?

जर E20 वाहनात E85 इंधन भरले, तर अनेक समस्या निर्माण होऊ शकतात. उदाहरणार्थ, इंजिनची कार्यक्षमता कमी होऊ शकते, इंधन प्रणाली खराब होऊ शकते, फ्यूल लाईन आणि सील्सचे नुकसान होऊ शकते, वाहन सुरू करण्यास अडचणी येऊ शकतात आणि दीर्घकाळात इतरही तांत्रिक समस्या निर्माण होऊ शकतात. इथेनॉल पेट्रोलपेक्षा वेगळ्या प्रकारे कार्य करते आणि त्यासाठी विशेष इंजिन कॅलिब्रेशन, फ्यूल इंजेक्शन सेटिंग्ज आणि योग्य मटेरियल क्षमतेची आवश्यकता असते. या सुविधा सामान्य E20 वाहनांमध्ये नसतात. त्यामुळे E20 वाहनधारकांनी E85 इंधन वापरण्याचा प्रयत्न करू शकत नाही.

E85 चा वापर कोण करू शकते?

E85 इंधनासाठी फ्लेक्स-फ्यूल वाहने (FFV) आवश्यक असतात. FFV वाहने विशेषतः विविध इथेनॉल-पेट्रोल मिश्रणांवर चालण्यासाठी डिझाइन केलेली असतात. साधारणपणे ती E20 ते E85 आणि काही प्रकरणांमध्ये E100 पर्यंतच्या मिश्रणावर कार्य करू शकतात. या वाहनांमध्ये इथेनॉल-प्रतिरोधक घटक, विशेष इंजिन व्यवस्थापन प्रणाली आणि फ्यूल मॅपिंग तंत्रज्ञान वापरले जाते, जे वापरल्या जाणाऱ्या इंधन मिश्रणानुसार आपोआप अॅडजस्ट होते.